Diamars 11 di November, Stichting Hunto a sera su siman di accion contra bullying cu un evento dedica specialmente na educadornan, trahadonan social y profeshonalnan cu ta traha directo cu hoben. E encuentro tabata e ultimo di tres eventonan grandi: e “Bullying Awareness Week” pa studiante di 5 diferente scol (3–7 November), un forum dedica pa mayornan (8 November), y awor e sesion profesional, cu mas di 350 persona registra. E interes grandi ta mustra cu Aruba ta sintiendo e necesidad urgente pa crea espasio mas sigur pa nos hoben nan, pero tambe pa ekipa e profesional nan cu hermentnan pa por trata cu e hoben nan.

E sesion a habri cu un charla di Johnny Boekhoudt, kende ta un Psycologo di mucha y hoben, Psycologo forensico y recherche, cu ta traha como coordinador na Centro Ortopedagogico na Aruba. Boekhoudt, cu hopi aña di experiencia den trabou clinico y investigativo, a presenta un panorama cla riba e diferente forma nan cu bullying por tuma luga, tanto den scol como den bario y online. E la pone enfasis riba señalnan tempran cu profesionalnan por wak, y e importancia di interveni dibiaha pa evita cu e situacion ta bira mas serio. E la comparti no solamente teorianan, pero tambe e realidadnan cu ta pasa na scol, den bario y riba social media. Boekhoudt a duna esnan presente e hermentnan pa detekta y interveni na tempo.

E encuentro a wordo guia door di host Nurianne Arias, kende a tene e transicion entre presentacion y dialogo smooth y profesional, dunando espacio pa tur hende compronde e informacion sin perde e dinamica.

Na final, un panel diversifica a comparti nan punto di bista tocante bullying. Den e panel tabatin:

  • Josephine Dirksz – Social Worker (DPS)
  • Eltienne Yarzagaray – Maestro di Scol
  • Adriana Dorothal – Psycologo na Stichting Hunto
  • Inocencio Matos – Coordinator di Polis di Bario
  • Samantha Romero – Studiante hoben

E panelista nan a comparti nan propio experencia y perspectiva tocante e topico di bullying den nan ramo. Cada un di nan a contibui un pida vital di accion nan cu por wordo tuma pa soluciona e problema: e.o. con ta mira e señalnan na tempo, con scol y famia por traha mas serca, con comunidadnan mester sostene seguridad psycosocial, kico un hoben mes mester pa por sintie den un ambiente sigur, pero tambe e importancia di selfempowerment.

E siman completo di actividad a sirbi pa integra tur e persona nan cu tin un papel den proteha nos hoben nan y hasi un cambio riba e tematica di bullying: studiante, mayornan, educadornan y profeshonalnan. Na tur tres evento, Stichting Hunto a pone enfasis tambe riba empoderamento propio. Nos ta pensa hopi biaha cu bully ta un persona rond di nos, pero regularmente nos mes ta bira nos mesun bully. Fortalese auto-confiansa, puntra bo mes con bo ta y dicon bo ta sinti asina, y traha riba empoderamento propio ta yuda no solamente pa combati bullying, pero tambe pa para fuerte dilanti cualkier reto cu bida por trece.

Stichting Hunto ta spera cu e esfuerso colectivo por duna lus nobo riba un tema cu hopi bes ta keda den silencio, y cu Aruba por sigui desaroya un cultura di seguridad y respet pa tur nos hoben nan.