Diahuebs 29 di November, Stichting HUNTO a organisa su prome forum publico, titula Breaking the Silence: Navigating Suicide & Self-Injury na JFK Education Center. Jonathan Trinidad, lecturer na Universidad di Aruba, a guia e evento manera moderador y Marion Ferber, un trainer di Hulanda, cu ta specialisa den e tema di suicidio y auto-lesion, tabata e speaker principal. Ademas, tabata tin un panel discussion cu un grupo di profesional nan den e area di salud mental y bienestar social, cu a comparti nan experencia y perspectiva riba e tema, stimulando un dialogo habri y informativo cu esnan presente.

Marion a comparti su experiencia y pasion pa yuda hende hoben cu ta enfrenta desafionan mental. Marion a cuminsa cu carera professional como docente. Durante su carera, ela inicia un projecto inovativo na GGD Den Haag, pa duna cuido na hobennan entre 12 y 27 aña, despues di un intento di suicidio. Tambe, e ta miembro di comision pa preveni suicidio. Su esfuersonan a wordo reconoci por medio di premionan prestigioso manera ‘Parnassiaprijs’, ‘Avicennaprijs’, y ‘Ivonne van de Venprijs’. Su dedicacion y esfuerso continuo ta inspira y crea cambio den e manera cu nos ta mira y maneha e tema di suicidio y auto-lesion.

E forum tabata un exito, cu mas di 150 persona presente. Aki, e tema di suicidio y auto-lesion, hopi biaha un topico tabu, a wordo trata den un manera respetuoso y habri. E meta tabata pa stimula dialogo habri. E forum tabata principalmente pa nos partnernan den e veld, incluyendo trahadornan social, docentenan, y profesionalnan den e veld di salud mental, social y educasion.

Den e segundo tanda, un panel di 6 experto a tene un discusion sano cu informacion y perspecitiva valioso:

• Raymicheline ‘Misha’ Raymond, Un GZ-psycholoog y Infant Mental Health specialist cu mas cu 10 aña di experiencia den psikiatria pa mucha y hoben. Misha ta dedica na derechonan di mucha, desaroyo humano, y salud mental como Parlamentario desde 2021.

• Rhomyko Winklaar, Director di FADA. Su lema, “Trata di expresa, no di impresiona!”, ta guia su trabou pa promove bienestar mental den comunidad.

• Janine Rodriguez, Coordinadora di Bureau Slachtofferhulp, un institucion cu ta asisti victima(nan) durante momentonan di crisis. Janine ta guia un ekipo cu ta duna sosten tanto na comunidad local como na turistanan.

• Jeff Feliciana, Un Licensed Professional Counselor cu Dual Masters den Counseling Psychology y International Peace and Conflict Resolution. Jeff tin 14 aña di experiencia den area di adiccion, depresion, y trauma, y ta un atleta ku pasion pa powerlifting y strongman.

• Marcelino Mauricio, Co-fundador di Mental Health Caribbean y director di Sentro Akseso Boneiru. Marcelino tin experiencia amplio den cuido mental y su dedicacion personal riba e tema di suicidio ta un inspiracion pa tur hende.

• Endel Kock, Trahador Social na EPB y coach deportivo, cu un gran dedicacion pa guia hoben.

Locual a resalta na e forum ta cu e participantenan a subraya e importancia di papia abiertamente riba problemanan mental, saca for di isolacion esnan cu ta sufri, y yuda tur hende compronde cu suicidio no ta un solucion final, pero un situacion cu nos por preveni. E plataforma a trece loke hopi hende ta sinti falta: empatia, educacion, y un red di sosten pa confronta y supera desafio di salud mental.

Stichting HUNTO ta satisfecho cu e gran animo y interes demostra durante e forum. Esaki ta demostra cu comunidad ta dispuesto pa trata e tema di suicidio y auto-lesion den un manera mas habri y sincero. Door di mira e impacto positivo, Stichting HUNTO lo sigui organisa charla y forumnan riba temanan asina importante.

Stichting HUNTO ta sigui dedica su esfuersonan pa elimina tabunan y duna e sosten necesario pa fortalece y empodera nos comunidad pa florece.